អ្នកនាំពាក្យក្រសួងមហាផ្ទៃ បានបដិសេធចំពោះការផ្សាយព័ត៌មានជាវីដេអូរបស់វិទ្យុអាស៊ីសេរី កាលពីថ្ងៃទី២៩ ខែវិច្ឆិកា ឆ្នាំ២០១៩ បានចោទប្រកាន់មិនត្រឹមត្រូវមកលើសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃថា បានបញ្ជាឲ្យចាប់ខ្លួនរាល់មុខសញ្ញាដែលចូលរួមដំណើរទទួលដំណើរលោក សម រង្ស៊ី ដោយមិនយល់មុខ ទោះជាជនពិការ អ្នកស្រែចំការ ឬអ្នកដែលគ្រាន់តែបញ្ចេញមតិ នៅលើបណ្តាញសង្គម Facebook ក៏ដោយ…។ នេះបើយោងតាមសេចក្តីបំភ្លឺរបស់អ្នកនាំពាក្យក្រសួងមហាផ្ទៃកាលីថ្ងៃទី២ ខែធ្នូ ឆ្នាំ២០១៩។
អ្នកនាំពាក្យក្រសួងមហាផ្ទៃ បានសម្តែងការសោកស្តាយចំពោះពាក្យខ្វះការពិត និងគ្មានគុណធម៌នេះហើយចាត់ទុកថា ការផ្សព្វផ្សាយរបស់វិទ្យុអាស៊ីសេរីបែបនេះ អាចនាំឲ្យសាធារណជនមានការយល់ច្រឡំលើការដឹកនាំរបស់សម្តេចក្រឡាហោម និងក្រសួងមហាផ្ទៃថា បានធ្វើការដោយឥតក្រែងរអែង និងមិនគោរពច្បាប់ទម្លាប់ជាធរមាន ក៏ដូចជាមានន័យថា កម្ពុជាមិនមែនជាប្រទេសប្រកាន់នីតិរដ្ឋ។
អ្នកនាំពាក្យក្រសួងមហាផ្ទៃ សូមគូសបញ្ជាក់ថា សម្តេចក្រឡាហោម ស ខេង ក្នុងឋានៈជាឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៃរាជរដ្ឋាភិបាលកម្ពុជា កើតចេញពីការបោះឆ្នោតតាមបែបប្រជាធិបតេយ្យ តែងតែគោរពជាដរាបតាមរដ្ឋធម្មនុញ្ញកម្ពុជា ហើយក្នុងឋានៈនេះ សម្តេចតែងតែផ្តោតការយកចិត្តទុកដាក់ជាពិសេសលើមាត្រា៤១ នៃរដ្ឋធម្មនុញ្ញ ដែលចែងថា ប្រជាពលរដ្ឋខ្មែរមានសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងការបោះពុម្ពផ្សាយ សេរីភាពខាងការប្រជុំ។ ជនណាក៏ដោយ មិនអាចឆ្លៀតប្រើសិទ្ធិនេះដោយរំលោភនាំឲ្យប៉ះពាល់ដល់កិត្តិយសរបស់អ្នកដទៃ ដល់ទំនៀមទម្លាប់ល្អរបស់សង្គម ដល់សណ្តាប់ធ្នាប់សាធារណៈ និងដល់សម្តីសុខជាតិបានឡើយ ។ ជាមួយគ្នានេះ ក្នុងនាមជាអ្នកទទួលខុសត្រូវលើស្ថាប័នបម្រើឲ្យការងារថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម សម្តេចតែងតែណែនាំដល់មន្ត្រីក្រោមឱវាទ និងកងកម្លាំងពាក់ព័ន្ធទាំងអស់ត្រូវធ្វើសកម្មភាពឲ្យបានត្រឹមត្រូវតាមផ្លូវច្បាប់ និងត្រូវជៀសវាងដាច់ខាតនូវការប្រើប្រាស់អំពើហិង្សា។
អ្នកនាំពាក្យក្រសួងមហាផ្ទៃបានបន្តទៀតថា ការផ្សាយខុសផ្សេងៗទៀត ដែលមិនគួរឲ្យជឿនោះ គឺវិទ្យុនេះបាននិយាយថា កងរាជអាវុធហត្តស្ថិតក្រោមការគ្រប់គ្រងរបស់ក្រសួងមហាផ្ទៃ។ នេះជាការចុះផ្សាយខុសស្រឡះ ហើយហាក់មានចេតនាមិនល្អមកលើសម្តេចក្រឡាហោម។ ម្យ៉ាងទៀតសូម្បីតែភូមិកំណើត ក៏វិទ្យុនេះមិនស្រាវជ្រាវឲ្យច្បាស់សិន សឹមផ្សាយនោះទេ។ តាមពិតភូមិកំណើតរបស់សម្តេចក្រឡាហោម ក៏ឈ្មោះភូមិអណ្តូងស្អាត (អណ្តូងបុរាណដែលមានទឹកថ្លាស្អាត) ពុំមានឈ្មោះភូមិអណ្តូងស្នាក ស្ថិតក្នុងឃុំក្របៅ ស្រុកកំចាយមារ ខេត្តព្រៃវែង នោះទេ។
អ្នកនាំពាក្យក្រសួងមហាផ្ទៃ នៅតែទទូចអំពាវនាវឲ្យវិទ្យុអាស៊ីសេរី ត្រូវផ្សព្វផ្សាយព័ត៌មានពិត ប្រកបដោយវិជ្ជាជីវ ថ្លៃថ្នូរ មានការទទួលខុសត្រូវខ្ពស់ ព្រមទាំងធ្វើឲ្យសាធារណជនបានទទួលនូវព័ត៍មានពិត និងត្រឹមត្រូវ ដែលមានផលប្រយោជន៍ដល់សង្គមជាតិកម្ពុជា៕

ទុក​ឱ្យ​ឆ្លើយ​តប​មួយ

សូមបញ្ចូលមតិយោបល់របស់អ្នក!
សូមបញ្ចូលឈ្មោះរបស់អ្នកនៅទីនេះ